Une catastrophe à la mine, le jour de Noël 1917, à Fléchinelle

Dins l'temps, in s'cauffot avec du bouos, et après, avec du carbon, ...

qu'y fallot d'abord trouver, avant de l'rassaquer du fin fond d'elle terre, avec gramint d'maux !

Y parait qu'ch'est dins les années 166O qu'in airot trouvé l'premier gisemint, dins l'région d'Boulonne : chà s'applot « La Providence », à Locquinghen.

À Réty, à Hardinghem, à Ferques, y'avot du carbon aussi, mais pont d'trop bonne qualité, avec des puits trop souvint inondés, chà qui fait qu'in a arrêté l'exploitation, vers la fin du dix-neuvième siècle !

Chà qui précède, in n'sin souvient pus d'trop et, quand qu'in parle éd'bassin minier, in parle des houillères du Nord et du Pas-de-Calais, avec in filon qui s'étind jusqu'in Belgique !

Et, à l'ouest, chà keuminchot du côté d'Estrée-Blanche et d'Enquin-les-Mines. Si bien, si qu'ô passez par là, y'a kor un terril, que l'végétation al'n'a pont kor armuché !

Ch'est à Fléchinelle, un hameau d'Enquin, qu'y avot l'Fosse n°1, d'elle compagnie d'Ligny-les-Aire.

Et y s'a produit un drame, él'jour éd'Noël 1917 : malgré la guerre, y fallot travailler pour fournir du carbon à la France !

Six chints ouvriers y'étaittent deschindus au fond, et, après deux heures éd'boulot, l'ouvrache avinchot bien, et in avot rimpli gramint d'berlines. Chétôt trop biau : un début d'inondation risquot d'nöyer l'puits, et ches galibots, invöyés par un porion, y sont arrivés in courant... et in criant « sauffe qui peut » !

Y'avot pont d'temps à perde, et tout l'monde y d'vot s'dépêcher, pour essayer d'arriver jusqu'au Transvaal, à Ligny, pour armonter à ch'puits n°2 (ch'est d'sus l'territoire éd'Ligny, à peu près à chinq kilomèttes). Seul'mint, y'avot des galeries d'effondrées, et par plaches, y fallot ramper à plat vintre, dins l'noir, comme des taupes... Dins l'min-temps, à l'accrochache, soit à quate chint chinquante mèttes éd'fond, y'avot des camarattes in train d'essayer d'colmater chelle fuite : y leur a fallu vingt quate heures éd'boulot pour y arriver !

Fort heureusemint, chà s'a bien terminé, et tous ches mineurs y zont pu armonter au jour pont un n'manquot à l'appel, comme l'ingénieur en chef y'a pu l'constater : toutes ches lampes y zavaittent été rapportées à l'lampisterie !

Armontés au jour, in peut pinser qu'tous ches braffes mineurs y zont dû pousser un fameux soupir éd'soulagemint - et boire un bon coup pour énne n'arvénir (et laver l'poussière !) - mais, quique jours après, y'a bien fallu ardéschinde au fond ! (ches hommes d'about ayant réussi à arboucher ches fuites, et l'iau ayant été pompée, pour dénöyer ches galeries).

Pour gagner s'croûte, et aussi, sur orde éd'la défense nationale : tout ch'bassin minier y'étôt occupé par l'armée allemande, jusqu'aux alintours éd'Béthune, et y fallot du carbon à tout prix, pour ches trains, ches usines, à l'arrière du front !

Telle est l'histoire éd'Noël 1917, à Fléchinelle et, à l'époque, y'avot pont d'télévision pour suiffe l'affaire au jour él'jour, comme chà s'a passé dernièremint au Chili.

Ch'est énne histoire qui s'a bien finie, et comme y'a pont grand monde qu'y peut s'in souv'nir, j'a pinsé à vous l'raconter... Si bien, d'êtte mobilisés au front, cloés dins énne tranchée, ou bien au fond, cloîtrés dins énne galerie, y'avot autant d'dangers, et chétôt quoi l'sort él'pus inviappe ?

Tout chà pour vous dire éq'nous autes, in 2O10, avec tout l'confort éd'la vie moderne, in airot tort de s'plainde... Et pourtant, inna kor gramint pour esse plainde éd'leux sort ? ! Mais, ch'est vrai qu'in est in France, un päys dù qu'y a autant d'gins que d'sujets d'préoccupation

samedi 25.12.2010, 05:14 - La Voix du Nord